Is uns ein Wurd afhann’n kamen?

Is egal, wat ick denn‘ Ferseh anmak, in‘t Internet kiek orer dei Tieding upschlag, oewerall prait mi ein Wurd an: Krieg! Dei britisch Armeechef warnt grad dei Inselbewahner sick up’n Krieg vörtaubereiten, dei dütsche Verteidigungsminister schlöggt in dei glieke Karw un von NATO un EU hürn wi nix anners: Russland will uns oewerfall‘n. Dor fragen sick nu iernst tau nähmende Pulletiker: Draugt uns eine reale Gefohr? Sünd dat PR-Nummern orer hebben wi dat mit ein Hysterie tau daun? Egal wecker mit sien Inschätzung recht hett, schlimm naug ist so orer so! Ick frag mi bi all dit Gedau: Worüm läs ick egalweg wat von Krieg, worüm so wenig orrer gor nix von Fräden? Is uns dit Wurd middewiel afhann’n kamen? Dat würd doch bispillswies dei EU-Vörsittersch väl bäder stahn, wenn sei nich mit ‘n Aktentasch vull Kriegsgerät, sonnern mit ‘n Frädensvörschlag in’e Hand nah Kiew reisen würd! Nich Waffenlieferungen beschluten, sonnern Grundlagen för’n Fräden schaffen, dat möt doch woll dei ierst Upgaw von uns Europäer sin. Dorbi süll’n wi Dütschen ut gauden Grund denn‘ Ton mit angäben! Un in dissen Tausamenhang is kum tau verstahn, dat grad ein gräun Biolog un ein bekannt Paster sick för mihr Waffenlieferungen an dei Ukraine utspräken. Dei Gräune müsst doch weiten, dat Biologie »die Lehre vom Leben« is! Naja, villicht hett hei falsche Vörläsungen besöcht. Bi denn‘ Paster bün ick mi oewer säker, dat hei dat Gebot »Du sollst nicht töten!« kennt. Worüm hei för Waffenlieferungen is, möt hei denn woll mit sick sülben afmaken. Ümmer wedder Krieg, siet Johrdusenden. Eigentlich müssten dei Minschen intwüschen je klauk naug sin, üm so’n Blautvergeiten tau vermeiden! Oewer Russland bräkt Krieg in’e Ukrai­ne von’n Tun un grad löse­n dei Hamas Krieg mit Israel ut. Dor stellt sick doch dei Frag: Sünd wi dunnmals sacht von’n Bom kladdert, üm uns dei Natu­r tau eigen tau maken un sünd wi dörch grotorrige Erfinnungen tau’n modernen Minschen worden, blot üm uns korte Tiet späder sülben uttaurotten? Dat weddersinnige doran is: Kein­ein will‘t un liekers daun wi dat. Kieken S‘, wenn dat würklich tau ein’n Drütten Weltkrieg kamen süll, geiht dat nich ahn Atombomben af un denn kann sick jedein uträken, wann uns‘ Planet nich mihr bewahnbor is! Wi räden väl oewer Klima, Streiks, Naturschutz un süs wat noch. Dat is richtig un ok nödig; man einen Sinn hebben dei Diskussionen blot, wenn up uns‘ Ierd Fräden herrscht! Wenn‘t in uns‘ Köpp nich klor ward, dat wi all dei Minschheitsprobleme blot in Fräden lösen könn’n, denn hebben wi bald dei Berechtigung, up dissen Planeten tau läwen, verspält! Wi möten mihr för’n Fräden daun!

Wolfgang Mahnke, , 21.03.2024