Dem deutschen Volke

Eigentlich müssten dei Kanzler, sien Ministerinnen, Minister un all dei Mitglieder in’n Bunnesdag je weiten, wohen dei Haas bi’t Regieren tau lopen hett, denn baben dei Ingangspurt von’n Reichsdag steiht: »Dem deutschen Volke«, wat in Trumpsche Läsort ok heiten künn: »Germany first«. Liekers bün ick mi nich säker, wat all, dei dor rin- un rutlopen, disse Würd ok läst hebben! Kieken S’, as dat üm denn’ Minnestlohn güng, gew dat twüschen SPD, FDP un Gräune Striet üm man blot viertig orer föftig Cent mihr. Geiht nich, hett dat heiten, dei Staatskass giwt dat nich her! Man poor Daag späder flüggt uns’ Butenministersch in’t Utland un schmitt dor mit dei Milliarden blot so üm sick! Woans is dat bi ein leddig Staatskass möglich? Ick hew nix gägen Sölidarität, spend ok ümmer wat, wenn’t nödig is. Man, wenn in ein riek Land as Dütschland Straten, Brüggen, Schaulen un wat süss noch, marode sünd, möt dei Staat doch woll mit sien Finanzen nich orrig plant hebben? Ogenschienlich hett dei »Ampelregierung« dat nich henkrägen! Oewer dei hett wenigstens kein Schulden makt. Kann oewer ok sin, dat dei Böwelsten von uns’ Regierung dörch ein separat Dör in’n Reichsdag gahn un dorüm nich weiten, wat oewer ehr Husdör schräwen steiht!? Unner dei CDU/SPD-Merz-Regierung sall dat nu je anners kamen. Geld is twors ümmer noch knapp un dorüm möten Schulden makt warden. Ok dei taukünftig Koa­litionspartner SPD stimmt för Milliarden Schulden, wovon ein grot Deil för Uprüstung utgäben warden sall (dat wunnert mi bi dei SPD nich, dei hebben je füher all för »Kriegskredite« stimmt!). Disse Schuldenmakerie ward »dem deutschen Volke« as ein ein Allheilmiddel anpriest, wat dei dütsche Wirtschaft wedder in Schwung bingt un wi all in’n poor Johr denn’ Wollstand mit Löppels äten könn’n! Alls schön un gaut, man weckerein sall dei 500 Milliarden plus Zinsen (!) denn wedder trüggtahlen? Merz un sien Regierung säker nich! Dat bliwt up uns’ Kinner un Kinneskinner sitten! Will’n wi dat dei nahkamend Generationen würklich andaun? Un wenn’t so kümmt, warden disse Generationen mit Recht oewer uns seggen: »Dei hebben dunnmals woll nich alle Tassen in’n Schrank hadd!« Villicht is ein Uprüstung in Dütschland würklich nödig, oewer Merz süll nich mit’n Säbel rasseln! Ick hür ümmer wedder: Russland bedraugt uns! Dorför sall’t sogor historische Bewiese gäben! Naja, soväl ick weit, hett Napoleon dunnmals Russland denn’ Krieg erklärt un nich annersrüm un Dütschland hett in’n Tweiten Weltkrieg Russland oewerfoll’n, nich annersrüm! Blot tau Erinnerung: Napoleon un Dütschland hebben sick mit ehren Krieg gägen Russland ein bläudig Näs halt un wi Dütschen hebben babentau dei Hälft von uns’ Territorium verluren! Bi ein’n drüddten Weltkreig bliwt denn woll von Dütschland nix mihr oewer. Orer?

Wolfgang Mahnke, per E-Mail, 23.04.2025