Mecklenburger Blitz Verlag

Das Anzeigenblatt für Mecklenburg-Vorpommern

Wat is wulffen?

22.02.2012, Behrend Böckmann

Dei jungen Lüd sünd doch up’n Kien! Dat is noch gor nich lang her, dor hemm’ all œwer Korl Theodor tau Guttenbarch (Johrgang 1971) ut Guttenbarch in Oberfranken schnackt. As Afkömmling von’n ollen Adel hett hei 10 Vörnåmen krägen un studiert Jura, måkt 2006/07 sienen Dokter un spält dornåh denn Gesellschafter vonne Guttenberg GmbH, ward CSU-Mitglied un kümmt œwer denn CSU-Verband Guttenbarch in’n Kulmbacher Kreisdach un låters sogor in’n Bunnesdach. As rutfunnen wür, dat dei grienig blachbläudig Minister tau Guttenbarch in sien Dokterarbeit väl afschräben harr un disse Gedanken nich in „Gäusfäut“ sett’t hett, keem hei mit inne Predulch. Tauierst versöcht hei sik ruttauräden, denn äuwt hei an sik sülben lütt bäten Kritik un denn fangt dei Ministersessel von denn taukünftigen Kanzlerkannedaten doch düchtig an tau wackeln. Hei lött un kann sik nich mihr hollen, mœt sienen Haut nähmen un wannert ut nå Amerika. As dat so wiet wier, harr dat Wurt „guttern“ all för dat sienen Platz inne dütsche Jugendspråk funnen, wat tau Guttenbarch måkt hett: von anner klauke Lüd afschrieben, inne eigen Dokterarbeit upnähmen un allens för sien eigen Gedanken utgäben.

Nu is „wulffen“ dat niege Wurt un dor kümmt wedder dei Fråch up, wat dat denn is. Dit Würt kümmt von dat, wat Wulf as Ministerpräsident von Neddersassen måkt hett un em nu as Bunnespräsidenten up’e Fäut föllt. In Gägensatz tau unsen iersten Rücktrittskannedaten hett Christian Wulff (Johrgang 1959) blot 3 Vörnåmen un wasst nich in ein Schlott up. As hei twei Johr olt is, låten sik dei Öllern scheiden. Hei blifft bi sien Mudder, besöcht dei Schaul un studiert dei Juristerie. In disse Tiet ward hei all Maat inne Junge Union un måkt bald as CDU-Baas in Osnabrück/Emsland von sik räden. Drei Mål mœt hei hei Anlopp nähmen, üm Ministerpräsident von Neddersassen tau warden un as hei dat taun tweiten Mal ward un sik ok taun tweiten Mal mit ’n junge PR-Beråderin verfriecht harr, röppt man em nå Berlin. Ok hier ward hei ierst nå’n drüdden Wåhlgang dei niege Herr in’t Schlott Bellevue. Hei treckt as dei teihnte un jüngste Bunnespräsident mit sien Fru Bettina as dei jüngst „Fürst Lady“ aller Tieden in’t Schlott in un dei junge Fru an sien Sied måkt ut denn piefigen Fürsten ut’e Provinz ’nen Grotstadtpoletiker, gifft em denn nödigen Schnied un böcht em dat Grienen as Deil von sien Körperspråk bi. Un wägen sien „Wulffen“ is hei ok dei Bunnespräsident, wecker dei körtste Tied in Bellevue dat Seggen harr. Tiedungslüd sünd achter son’n por nich ganz kosche Såken kåmen, höllen dei för verdächtig un wullen dat inne Tiedung setten. Wulff kreech Wind dorvon un schrifft ut’n Utland einen Jornalisten in Dütschland up’n Nåhrichtenupnähmer vör, disse Såk in’n Tausamenhang mit dei Person Wulff nich inne Tiedung bekannt tau måken. Dor hemm’ dei iersten all an „wulffen“ dacht. Œwer denn keem noch dat ein un anner ut dei Minister-

präsidententiet n rut un bald is klor: dei ümmer grienige Wulff kennt as Jurist nich so würklich dei Scheer twüschen Ethik un Moral un œwersüht dei Gefohren twüschen Poletik un Kapitål. Hei lecht sik allens so taurecht, as hei dat bruken kann, höllt af un an wat achtern Barch, schwiecht œwer lütte Geschenke un lött nich mihr kieken, as hei för nödig höllt. So hett Wulff wull nie nich würklich lågen, œwer ok nie nich würklich dei Wohrheit secht. Un disse Oort Ümgang mit anner Minschen is dat würklich „Wulffen“. „Wulffen“ hett em nu inbröcht, dat hei mit Bettina Schlott Bellevue verlåten mœt. Nå disse korte Amtstiet blieben Bettina un Christian Wulff noch dei Tauversicht up denn Ihrensold von 199.000 Euros in’t Johrt bet an ehr seelig Enn’. Dorför wür ik ok mål por Dåch in Bellevue intrecken un denn Bunnespräsidenten spälen.

 

 

 

 

 

 

 

Hier können Sie Ihre Leserbriefe online aufgeben

Bitte beachten Sie, dass wir uns das Recht vorbehalten, im Falle des Abdruckens in der Zeitung, Textpassagen zu kürzen oder nachträglich zu ändern.