Mecklenburger Blitz Verlag

Das Anzeigenblatt für Mecklenburg-Vorpommern

»Kid Cars« orrer

09.03.2011, Behrend Böckmann

Nu will ik mal »Bäder as gaut« inköpen un dor föllt mi gliek an’n Ingang son’n Kid Cars up. Man mœt blot noch sülben dat Kind rinsetten un kann denn ganz kommodig ahn grot Kinnergequarr inköpen. Ja, in son’n Fohrtüch heff ik as Kind ok mal säten, Œwer nich in’t Kophus, sonnern in’t Fohrgeschäft, wo man för por Pennings väle Runnen dreihen künn. Dunnemals wiern wi noch ’n Kind un kein Kid as dat hüt dei Fall is. Vörn half Johrhunnert geef dat nochKinnerwagens, Kinnerroller un Kinnerfohrroe’. Worüm mœt son’n Fohrtüch hütigendachs »Kit Cars« heiten? Ik bekiek mi son’n Ding bäten neeger un läs denn »Kid Cars® 32312 Lübbecke«. Un würklich, in Lübke, so heit Lübbecke in Nuurdrhein-Westfalen gifft da t ’n »Vertriebsgesellschaft«, bi dei man »In-kopsmobile« köpen un hüern kann un dei ok för’t Afsetten un Ünnerhollen taustännig is. Dormit is klor, dat disse Gesellschaft blot mit »Kid Cars« hannelt, dei womoeglich ut China kamen.

1974 mit ein Kophus in Eutin anfungen, is dit Ünnernähmen nu in mihr as 80 Uurten in Nuurddütschland tau finnen un dorför stahn »Kid Cars« näben dei Inköppskörff up Rœ’. Passt œwer Kid Cars tau uns Nuurddüütsche orrer wier Kinnerkutsch, Kinnerkor, för Kinnings nich väl bäder?

Villicht kennt dei ein un anner noch denn Lüdschnack: Scheif is engelsch un engelsch is modern. Dat keem vonne Bein vonne »Chippendale«-Stäuhl. Späder hemm’ dat dei Frugenslüd ümmer antert, wenn ein tau ein anner secht hett, dat dei Naht vonne Strümp nich ganz grad wier. Hüt ward von Kids schnackt, denn man glöwt, dormit Kinner wat Gaudet antaudaun. Dorbi weiten dei mirsten nich, dat dit Wurt ut Amerikansch un Engelsch taun einen wieder nicks as Kitz orrer lüttet Diert bedüden deit un taun annern ein Schimpwurt för Kinner un junge Lüüd is, dei wi villicht as Dwassdriewer un Dallerficken kennen. Na un na wür Kid inne dütsche Jugendsprak œwernahmen un männigein secht ok, dit Ami-Kauderwelsch verwennen dei Ollen blot, wenn’s sik bi Kinner un junge Lüüd beleiwt maken willen. Wür ’n Kinnerkutsch dat Geschäft nich noch bäder beläwen? Man süll mal œwer nadenken!

 

Hier können Sie Ihre Leserbriefe online aufgeben

Bitte beachten Sie, dass wir uns das Recht vorbehalten, im Falle des Abdruckens in der Zeitung, Textpassagen zu kürzen oder nachträglich zu ändern.