Mecklenburger Blitz Verlag

Das Anzeigenblatt für Mecklenburg-Vorpommern

Dat MHD is aflopen

16.04.2012, Behrend Böckmann

Vör 30 Johr wür dat MHD in Ümlopp bröcht un von disse Tiet an sünd ümmer wedder Lüd in’n Super-Markt antaudräpen, dei vör dei Buurten ståhn un äben dat MHD säuken un dorbi inne Reigen dat Hinnelste na Vörn un dat Ünnelste nå Båben kihren. Un nu, nå 30 Johr kriecht ’n mit, dat dörch disse Kiekerie up dat MHD Johr för Johr 11 Milljonen Tunnen Brot, Wust, Kees, Aft un anner Ätenworen dor lannen, wo’s nich lannen süllen. Räken wi dat up Dütschlands Inwåhners üm, denn schmitt jederein von uns 130 kg in Johr wech, dat is knapp ’n Pund pro Minsch un Dach. Hentau kåmen noch Såken, dei dörch dei Vörschriften ut Brüssel gor nich ierst inne Buurten lannen un gliek up’n Mess kåmen orrer dei Schwien vörsett ward.

Nu will man twors dat MHD nich fallen låten, œwer man röppt dortau up, doch bäten mihr mit alle fief Sinnen intauköpen. Lihrnen kann dei Minsch von hüt noch ’n lütt bäten von sien Vöröllern, dei åhn MHD, Kœhlschap un Deipkœhlkist utkåmen sünd. Einmal inne Wäk würn dei Weckglös ünnersöcht, dat dei Deckels noch fast sitten orrer bi Blechdosen fäuhlt, dat’s nich utbuhlen. Güng denn mål ’n Deckel hoch orrer ’n Dos wier verdächtig, denn wür nich gliek allens wechschmäten, sonnern ierst ünnersöcht. Mit dei Näs œwer’t åpen Läwerwustglas wür denn faststellt, dat’s noch gaut, nich mihr so ganz kosche is orrer gor suer rüken deit.

Ok dörch Fäuhlen mit’n Finger kreech Größing rut, dat dei Rökerschinken in’n gauden Taustand is un sik kein bäten mulschig orrer ollmig anfäuhlen deit. Harr sik up’e inkåkt Marmelad’ mål ’n Schimmelplacken afsett, denn wür dei afnåhmen un dörch Präuwen faststellt, kümmt dat noch up’n Disch orrer wannert dat gliek in’t Drankemmel. Un woans hett Größing dat mit dat MHD för Eier hollen? Sei harr ümmer Häuhner, œwer nich ümmer frische Eier. Wiern dei Häuhner inne Mauser, lechten sei nich un dorüm würn in’n Harst all Eier för dei Wihnachtsbäckerie upwohrt. Sei keemen in ’n Hackelschkist ünner’t Bedd un würn einmål inne Wäk dreiht, dormit sik dat Gäl nich ansetten däd. Liekers wür jedet Eier einzeln upschlågen, dormit kein fulet Ei mank dei gauden kümmt. (gekürzt)

 

Hier können Sie Ihre Leserbriefe online aufgeben

Bitte beachten Sie, dass wir uns das Recht vorbehalten, im Falle des Abdruckens in der Zeitung, Textpassagen zu kürzen oder nachträglich zu ändern.